ကိုဗစ်-၁၉ရောဂါအတွက် ကာကွယ်ရေးပစ္စည်းများ ပေးအပ်လှူဒါန်း
ဧလ ၂၀၂၀ ခုနှစ်၊ ၈ ရက် U Min Eya Htyke

မင်းတပ် ဧပြီ ၈ ချင်းပြည်နယ် မင်းတပ်မြို့ ခရိုင်ပြည်သူ့ကုသ/ကျန်းမာရေးဦးစီးဌာန ဦးစီးမှူး ဒေါက်တာဇော်ဝင်းနိုင်ထံ ယမန်နေ့ နံနက် ၉ နာရီတွင် မင်းတပ်မြို့မှ အချောဆုံး၂၅ ဦးအဖွဲ့၏အလှူခံမှုဖြင့် မင်းတပ်မြို့နယ် အတွင်းရှိ စေတနာရှင်မိဘပြည်သူများနှင့် ပြည်ပရောက်မင်းတပ်ချင်းလူမျိုးတို့၏ အလှူထည့်ဝင်မှုနှင့် သက်နှင်းဆု ကုမ္ပဏီ (ဆိုင်ကယ်ဖြန့်ချိရေးကျယ်ဂေါင်) တို့မှ ကိုဗစ်-၁၉ရောဂါအတွက် ကာကွယ်ရေး ပစ္စည်းများပေး အပ်လှူဒါန်းကြကြောင်း သိရသည်။ မင်းတပ်မြို့၌ ကိုဗစ်-၁၉ ရောဂါအတွက်ဖွဲ့စည်းထားသော အချောဆုံး၂၅ ဦးအဖွဲ့မှ ဒေါ်နိုဝင်ထွေး က " အခု ကျွန်မတို့က မင်းတပ်မြို့မှာရှိတဲ့သူငယ်ချင်းတွေစုပြီးတော့ဖွဲ့ထားတာပါ၊ ကိုဗစ်-၁၉ ရောဂါ ကာကွယ်ရေးမှာ အသုံးပြုဖို့အတွက် မင်းတပ်မြို့ပေါ်နဲ့ နယ်တွေမှာရှိတဲ့စေတနာရှင် မိဘပြည်သူတွေနဲ့ ပြည်ပရောက်မင်းတပ်ချင်းလူမျိုးတွေက ထည့်တဲ့အလှူငွေတွေနဲ့ နှာခေါင်းစည်းတွေ၊ လက်ဆေးရည်တွေ၊ PPE ဝတ်စုံတွေကို ဝယ်ပြီးတော့ မင်းတပ်မြို့မှာရှိတဲ့ ကျန်းမာရေးဝန်ထမ်းတွေကနေ လိုအပ်တဲ့နေရာ ဒေသတွေမှာ ပြန်အသုံးပြုဖို့အတွက် လှူဖြစ်တာပါ။ မတ်လ ၃၀ ရက်နေ့ကလည်း ကျွန်မတို့အဖွဲ့က ဆေးရုံနဲ့မြန်မာ့စီးပွားရေးဘဏ်တွေမှာ နှာခေါင်းစည်း၊ Hand Gelနဲ့အရက်ပြန်တွေ လှူဒါန်းခဲ့ပါတယ်။ မိဘပြည်သူတွေအနေနဲ့လှူဒါန်းချင်တယ်ဆိုရင်တော့ ကျွန်မတို့အဖွဲ့ကို ဆက်သွယ်လို့ရပါတယ်။" ဟုပြော သည်။ မင်းတပ်ခရိုင်ပြည်သူ့ကုသ/ကျန်းမာရေးဦးစီးဌာနဦးစီးမှူး ဒေါက်တာဇော်ဝင်းနိုင်က "ခုကိုဗစ်-၁၉ရောဂါကို ကျန်းမာရေးဝန်ထမ်းတွေထဲနဲ့ထိရောက်အောင်ကုသလို့မရနိုင်ပါဘူး၊ မိဘပြည်သူတွေရဲ့ ပူးပေါင်းပါဝင်မှုကသာ အဓိကပါ။ အားလုံးပူးပေါင်းပါဝင်ဆောင်ရွက်မှသာ ဒီကိုဗစ်-၁၉ ရောဂါကြီးကို ကာကွယ်ကုသနိုင်မှာဖြစ်ပါတယ်။ ကိုဗစ်-၁၉ ရောဂါကာကွယ်ရေးအတွက် လိုအပ်တဲ့ကာကွယ်ရေး ပစ္စည်းတွေကို လာရောက်လှူဒါန်းပေးတဲ့ အလှူရှင်တွေကို ကျေးဇူးတင်ပါတယ်" ဟုပြောသည်။ ဒေါ်လောရောင် လက်ထောက်ကျန်းမာရေးမှူးက "ပုဂ္ဂိုလ်တစ်ဦးချင်းစီ လာလှူတာလည်းရှိတယ်၊ အဖွဲ့အစည်းအနေနဲ့လာလှူတာလည်းရှိတယ်၊ INGO နဲ့ NGO အဖွဲ့အစည်းတွေကလည်း ကိုဗစ်-၁၉ ရောဂါအတွက် ကာကွယ်ရေးပစ္စည်းတွေ လာရောက်လှူဒါန်းကြပါတယ်။ ခုလိုလာရောက်ပြီး လှူဒါန်း ပေးကြတဲ့အလှူရှင်တွေ၏အားလုံးကို ကျေးဇူးအထူးတင်ပါတယ်။" ဟု ပြောသည်။ ကိုဗစ်-၁၉ ရောဂါအတွက် ကာကွယ်ရေးပစ္စည်းများ လာရောက်လှူဒါန်းပေးကြသော အလှူရှင်များကို ခရိုင်ပြည်သူ့/ကုသရေးဦးစီးဌာန ဦးစီးမှူး ဒေါက်တာ ဇော်ဝင်းနိုင်က ဂုဏ်ပြုမှတ်တမ်းလွှာများ ပြန်လည်ပေးအပ်ကြောင်း သိရသည်။ ခွီရှိန်းမောင်း(ခရိုင်ပြန်/ဆက်)

မင်းတပ်မြို့၌ Community Based Facility Quarantine နေရာသတ်မှတ်ပြီး ခုတင်အလုံး(၁၂၀)ပြင်ဆင်ထားရှိ
ဧလ ၂၀၂၀ ခုနှစ်၊ ၇ ရက် U Min Eya Htyke

မင်းတပ် ၊ ဧပြီ - ၇ ချင်းပြည်နယ်၊ မင်းတပ်မြို့၌ ကိုဗစ်-၁၉ရောဂါ ကြိုတင်ကာကွယ်ထိန်းချုပ်ရေးအတွက် Community Based Facility Quarantine နေရာသတ်မှတ်ပြီး ခုတင်အလုံး(၁၂၀) ပြင်ဆင်ထားရှိမှုကို ခရိုင် အုပ်ချုပ်ရေးမှူးဦးမောင်ထူးနှင့် ဌာနဆိုင်ရာတာဝန်ရှိသူများပူးပေါင်း၍ ယနေ့နံနက် ၉ နာရီအချိန်က ကွင်းဆင်းစစ်ဆေးခဲ့ကြသည်။ နယ်စပ်ရေးရာဝန်ကြီးဌာန၊ ပညာရေးနှင့်လေ့ကျင့်ရေးဦးစီးဌာန၊ နယ်စပ်ဒေသတိုင်းရင်းသား လူငယ်များဖွံ့ဖြိုးရေး သင်တန်းကျောင်းအမှတ်(၁)၊ အမှတ်(၂)ကျောင်းနှင့် အမျိုးသမီးအိမ်တွင်းမှု သက်မွေး လုပ်ငန်းပညာသင်ကျောင်း(မင်းတပ်မြို့)ရှိ အဆောင်များအား Community Based Facility Quarantine နေရာအဖြင့် သတ်မှတ်ပြီး ခုတင်အလုံး(၁၂၀)ပြင်ဆင်ထားရှိကြောင်း လူငယ်သင်တန်းကျောင်း အမှတ်(၁) ကျောင်းအုပ်ဆရာကြီး ဦးကီးအောင်ထန်း ထံမှသိရသည်။ လူငယ်သင်တန်းကျောင်း အမှတ်(၁)ကျောင်းအုပ် ဆရာကြီး ဦးကီးအောင်ထန်း က " သံသယလူနာတွေအတွက် တည်းခိုနေထိုင်ရေးသာမက ချက်ပြုတ် ကျွေးမွေးရေးလုပ်ငန်းများကိုလည်း အဆင်ပြေအောင် ပြင်ဆင်ထားတယ်၊ သောက်ရေသုံးရေနှင့် မီးရရှိရေး အတွက်လည်း ပြင်ဆင်ထားတယ်" ဟုပြောကြားသည်။ အဆိုပါ Community Based Facility Quarantine နေရာများတွင် သန့်ရှင်းရေဆောင်ရွက်ခြင်း နှင့် ပိုးသတ်ဆေးဖြန်းခြင်းလုပ်ငန်းများကို မြို့နယ်ကျန်းမာရေးဦးစီးဌာန နှင့်ပူးပေါင်းဆောင်ရွက်ထားကြောင်း သိရသည်။ မင်းတပ်မြို့၌ ပြည်ပမြှပန်လည်ရောက်ရှိလာသူ (၁၀၂)ဦးရှိပြီး ရောဂါလက္ခဏာ မတွေ့ရှိရ ကြောင်း မင်းတပ်ခရိုင်ကျန်းမာရေးဦးစီးဌာနမှူး ဒေါက်တာဇော်ဝင်းနိုင် ထံမှသိရသည်။ ဆလိုင်းအောင် (ပြန်/ဆက်)

ချင်းပြည်နယ် အထွေထွေအုပ်ချုပ်ရေးဦးစီးဌာနမှ ဌာနအတွင်းဝန်ထမ်းများအား ဆန်၊ကြက်ဉနှင့် ကာဘော်လိပ်ဆပ်ပြာခဲများ ထောက်ပံ့
ဧလ ၂၀၂၀ ခုနှစ်၊ ၆ ရက် U Min Eya Htyke

ဟားခါး ဧပြီ ၆ ချင်းပြည်နယ် အထွေထွေအုပ်ချုပ်ရေးဦးစီးဌာနမှ မိမိဌာနအတွင်းဝန်ထမ်းများ သက်သာ ချောင်ချိရေး၊ စားနပ်ရိပ်က္ခာဖူလုံရေးအတွက် ထောက်ပံ့ပေးအပ်ပွဲ အခမ်းအနားကို ယနေ့ ညနေ ၂နာရီ အချိန်က ဟားခါးမြို့ ၊ပြည်နယ် အထွေထွေအုပ်ချုပ်ရေးဦးစီးဌာန အစည်းအဝေးခန်းမ၌ ကျင်းပရာ ချင်းပြည်နယ် အထွေထွေအုပ်ချုပ်ရေးဦးစီးဌာနပြည်နယ်အုပ်ချုပ်ရေးမှူး ဦးတိုးဝင်းနှင့် ဌာနအတွင်းမှ အရာထမ်း၊အမှုထမ်းများ တက်ရောက်ခဲ့ကြပါသည်။ ရှေးဦးစွာ ချင်းပြည်နယ် အထွေထွေအုပ်ချုပ်ရေးဦးစီးဌာန ပြည်နယ်အုပ်ချုပ်ရေးမှူး ဦးတိုးဝင်းက လတ်တလောဖြစ်ပေါ်လျက်ရှိသော COVID-19 ထိန်းချုပ်ရေးနှင့်အရေးပေါ် တုံ့ပြန်မှု ကာလအတွင်း မိမိဌာနဝန်ထမ်းများအား စာနပ်ရိခက္ခာဖူလုံစေရေး အထောက်အပံ့ဖြစ်နိုင်စေရန် ကူညီထောက်ပံ့ရခြင်း ဖြစ်ပါကြောင်း၊အရာထမ်း၊အမှုထမ်း အားလုံးအား ဌာနမှတတ်နိုင်သည့် အခြေအနေဖြင့် ညီမျှစွာ ခွဲဝေထောက်ပံ့ပေးရခြင်း ဖြစ်ပါကြောင်း ရှင်းလင်းပြောကြားသည်။ ထို့နောက် ချင်းပြည်နယ်အထွေထွေအုပ်ချုပ်ရေးဦးစီးဌာနရှိ အရာထမ်း၊အမှုထမ်း စုစု ပေါင်း(၂၁၀)ဦးအတွက် ဆန်(၁၀၅)တင်း၊ ကြက်ဉ(၁၈၆၀ )လုံးနှင့်ကာဘော်လိပ်ဆပ်ပြာ(၂၁၀)ခဲ ကို ထောက်ပံ့ပေးအပ်ခဲ့ကြောင်း သိရှိရသည်။ အောင်ခွီရှိန်း (ပြန်/ဆက်)

ချင်းပြည်နယ် အတွင်း COVID-19 ​ရောဂါကာကွယ်၊ထိန်းချုပ်၊ကုသနိုင်​ရေး ဟားခါမြို့ အဝင် လုံခြုံ​ရေးဂိတ်၌ ခရီးသွားပြည်သူများအား စစ်​ဆေးမှုများ ​နေ့စဉ်​ဆောင်ရွက်လျက်ရှိ
ဧလ ၂၀၂၀ ခုနှစ်၊ ၅ ရက် U Min Eya Htyke

ဟား ခါး ဧပြီ ၅ ချင်းပြည်နယ်အတွင်း COVID-19 ​ရောဂါကာကွယ်၊ထိန်းချုပ်၊ကုသနိုင်​ရေး ပြည်နယ် အစိုးရအဖွဲ့နှင့် သက်ဆိုင်ရာ တာဝန်ရှိသူများက ဘက်​ပေါင်းစုံမှ ​နေ့စဉ် အရှိန်အဟုန်မြှင့် ​ဆောင်ရွက်လျက်ရှိရာ ဧပြီလ ၅ရက်​နေ့က ဟားခါးမြို့သို့ လာ​ရောက်ကြသည့် ခရီးသွားပြည်သူများကို ဟားခါးမြို့အဝင် လုံခြုံ​ရေး ၊ (တန်ပို)စစ်​ဆေး​ရေးဂိတ်၌ ဟားခါးမြို့မရဲတပ်ဖွဲ့မှ ဦးဆောင်၍ ကျန်းမာ​ရေး​စောင့်ကြည့်စစ်​ဆေးမှုများနှင့် ပညာ​ပေးလုပ်ငန်များ​ဆောင်ရွက်လျက်ရှိ​ကြောင်းသိရသည်။ ဟားခါးမြို့အဝင် လုံခြုံ​ရေး ၊(တန်ပို)စစ်​ဆေး​ရေးဂိတ်၌ ဟားခါးမြို့မ ရဲစခန်းမှူး ဒုရဲမှူး သိန်းဇော်ဦး ဦးဆောင်သည့် တပ်ဖွဲ့ဝင်များ၊ မြို့နယ် အထွေထွေအုပ်ချုပ်ရေး ဦးစီးဌာနမှ တာဝန်ကျဝန်ထမ်းများ၊ မြို့နယ်ကျန်းမာရေးဦးစီးဌာနမှ တာဝန်ကျဝန်ထမ်းများနှင့် ပူး​ပေါင်းပါဝင်လျက် ​မော်​တော်ယာဉ်များ​ပေါ်တွင်စီးနင်းလိုက်ပါလာကြသည့် ခရီးသွားပြည်သူများနှင့် ယာဉ်မောင်းနှင်သူများ၊ ဆိုင်ကယ် စီးနင်းလာသူများကို ကျန်းမာ​ရေး​စောင့်ကြည့်စစ်​ဆေးခြင်း၊ချင်းပြည်နယ်အစိုးရအဖွဲ့က ထုတ်ပြန်​ကြေညာ ထားသည့် ပြည်သူလူထုထံသို့​မေတ္တာရပ်ခံပန်ကြားချက်များနှင့်ညွှန်ကြားချက်များအားခရီးသွားပြည်သူများ သိရှိလိုက်နာ​ဆောင်ရွက်နိုင်​ရေး​ ဆွေး​နွေး​ပြောကြားခြင်းနှင့် ကျန်းမာ​ရေးဦးစီးဌာနကထုတ်ပြန်​ကြေညာ ထားသည့် COVID-19​ရောဂါ နှင့်ပတ်သက်သည့် ​ဆောင်ရန် ​၊ရှောင်ရန် အသိပညာ​ပေးကိစ္စရပ်များကို ခရီးသွာပြည်သူတစ်ဦးချင်းစီအား ​ဆွေး​နွေး​ပြောကြားကာ COVID -19 ​ရောဂါ ကာကွယ်ထိန်းချုပ်သည့် လုပ်ငန်းများ​အောင်မြင်မှုရရှိ​စေ​ရေး​ဆောင်ရွက်ခဲ့ကြ​ကြောင်းသိရှိရပါသည်။ အောင်ခွီရှိန်း (ပြန် /ဆက်)

ဖလမ်း၌ COVID-19 ရောဂါ ကာကွယ်၊ ထိန်းချုပ်၊ကုသနိုင်ရေးကော်မတီ ပြည်နယ်အဆင့်နှင့် ခရိုင်၊ မြို့နယ် အဆင့်အစည်းအဝေးပြုလုပ်
ဧလ ၂၀၂၀ ခုနှစ်၊ ၄ ရက် U Min Eya Htyke

ဖလမ်း ဧပြီ ၄ COVID-19 ရောဂါကာကွယ်၊ ထိန်းချုပ်၊ ကုသနိုင်ရေးကော်မတီ ပြည်နယ်အဆင့်နှင့် ခရိုင်၊ မြို့နယ် အဆင့် အစည်းအဝေးကို ဧပြီ ၄ ရက် နံနက် ၉ နာရီက ဖလမ်းမြို့ တောင်ဇလပ်ရိပ်သာ၌ ပြုလုပ်သည်။ ရှေးဦးစွာ ချင်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဦးဆလိုင်းလျန်လွယ်က အမှာစ ကားပြောကြားသည်။ ထို့နောက် COVID-19 ရောဂါကာကွယ်၊ ထိန်းချုပ်၊ ကုသနိုင်ရေး ပြည်နယ်အဆင့် လုပ်ငန်းကော်မတီ ဉက္ကဋ္ဌ ပြည်နယ်လူမှုရေးဝန်ကြီး ဦးပေါင်လွန်းမင့်ထန်၊ ပြည်နယ်စည်ပင်သာယာရေး၊ လျှပ်စစ် နှင့်စက်မှုလက်မှုဝန်ကြီး ဦးစိုးထက်၊ ပြည်နယ် အစိုးရအဖွဲ့အတွင်းရေးမှူး ဦးတိုးဝင်းနှင့် COVID-19 ရောဂါကာကွယ်၊ ထိန်းချုပ်၊ ကုသနိုင်ရေး ပြည်နယ်အဆင့် လုပ်ငန်းကော်မတီ အတွင်းရေးမှူး ဒေါက်တာ အောင်ငွေစံ တို့က COVID-19 ရောဂါကာကွယ်၊ ထိန်းချုပ်၊ ကုသနိုင်ရေးနှင့် စားနပ်ရိက္ခာသိုလှောင်ထားရှိမှုအခြေအနေများကို အသီးသီးဆွေးနွေးကြသည်။ ဆက်လက်၍ COVID-19 ရောဂါကာကွယ်၊ ထိန်းချုပ်၊ ကုသနိုင်ရေး ဖလမ်းခရိုင် လုပ်ငန်းကော်မတီ ဉက္ကဋ္ဌ ခရိုင်အုပ်ချုပ်ရေးမှူး ဦးအောင်ကျော်ထွန်း၊ အတွင်း ရေးမှူး ဖလမ်းမြို့ ပြည်သူ့ဆေးရုံကြီး ဆေးရုံအုပ် ဒေါက်တာတလွန်ကျုံးထန် နှင့် တာဝန်ရှိသူများက ဖလမ်းမြို့အတွင်း COVID-19 ရောဂါကာကွယ်၊ ထိန်းချုပ်၊ ကုသနိုင်ရေး လုပ်ငန်းဆောင်ရွက်မှု အခြေအနေများကို ရှင်းလင်းသည်။ ထို့နောက် ပြည်နယ်ဝန်ကြီးချုပ်နှင့် လူမှုရေးဝန်ကြီးတို့က COVID-19 ရောဂါကာကွယ်၊ ထိန်းချုပ်၊ ကုသရေး လုပ်ငန်းများတွင် အသုံးပြုရန် ထောက်ပံ့ငွေ၊ PPE ဝတ်စုံ၊ လက်အိတ်၊ နှာခေါင်းစည်း၊ သာမိုမီတာ၊ ဆေးစိမ်ခြင်ထောင်၊ စားဆီ တို့ကို ပေးအပ်လှူဒါန်းပြီး ဖလမ်းမြို့ ပြည်သူ့ ဆေးရုံကြီး ဆေးရုံအုပ်က လက်ခံရရှိသည်။ ပြည်နယ်ဝန်ကြီးချုပ်နှင့်အဖွဲ့သည် ဖလမ်းမြို့တွင် ပြည်ပနိုင်ငံများမှ ပြန်လာသူများ၊ အလည်လာသူများအား Facility Quarantine ဖြင့် ထားရှိသည့် သူနာပြုသင်တန်းကျောင်း ချယ်ရီခန်းမ၊ Hospital Quarantine ထားရှိသည့်နေရာနှင့် Isolation ခန်းများကို ကြည့်ရှုစ်ဆေးခဲ့ကြောင်းသိရသည်။ ဂျွန်( ပြန်/ ဆက်)

ပြည်နယ်ဝန်ကြီးချုပ်ကဖလမ်းမြို့ ဒေသဖွံ့ဖြိုးရေးလုပ်ငန်းများ ကြည့်ရှုစစ်ဆေး
ဧလ ၂၀၂၀ ခုနှစ်၊ ၄ ရက် U Min Eya Htyke

ဖလမ်း ဧပြီ ၄ ချင်းပြည်နယ်အစိုးရအဖွဲ့ ပြည်နယ်ဝန်ကြီးချုပ် ဦးဆလိုင်းလျန်လွယ်သည် ပြည်နယ် အစိုးရဖွဲ့ဝင် စည်ပင်သာယာရေး၊ လျှပ်စစ်နှင့်စက်မှုလက်မှုဝန်ကြီး ဦးစိုးထက်၊ ပြည်နယ် လူမှုရေးဝန်ကြီး ဦးပေါင်လွန်းမင့်ထန်၊ ပြည်နယ်အစိုးရအဖွဲ့ အတွင်းရေးမှူး ဦးတိုးဝင်းနှင့် ပြည်နယ်၊ ခရိုင်၊ မြို့နယ်ဌာနဆိုင်ရာများနှင့်အတူ ဧပြီ ၄ ရက် မွန်းလွဲပိုင်းက ဖလမ်းမြို့ ဒေသဖွံ့ဖြိုးရေးလုပ်ငန်းများကို ကြည့်ရှုစစ်ဆေးသည်။ ပြည်နယ်ဝန်ကြီးချုပ်နှင့် အဖွဲ့သည် ဖလမ်းမြို့နယ် မြို့နယ်ခန်းမဆောင်အသစ် ဆောက် လုပ်မည့် အခြေအနေများအား ကြည့်ရှုစစ်ဆေးပြီး သက်ဆိုင်ရာဌာန တာဝန်ရှိသူများနှင့် ကုမ္ပဏီ တာဝန်ရှိသူများက အဆောက်အဦ ဆောက်လုပ်မည့်အခြေအနေများကို ရှင်းလင်းတင်ပြသည်။ ထို့နောက် မြို့ပြနှင့်အိမ်ရာဖွံ့ဖြိုးရေးဦးစီးဌာနမှ ဆောက်လုပ်လျက်ရှိသည့် ဝန်ထမ်းအိမ်ရာ RCC (၄)ခန်းတွဲ (၂)ထပ် ဆောက်လုပ်နေမှု အခြေအနေများကို ကြည့်ရှုစစ်ဆေးခဲ့ကြောင်းသိရသည်။ ဂျွန်(ပြန်/ ဆက်)

တရုတ်နိုင်ငံမှ ပြန်လာသူအား COVID-19 ရောဂါကူးစက်ပြန့်ပွားမှုမရှိစေရေး Facility Quarantine ဖြင့် (၁၄)ရက်ကြာ စတင်စောင့်ကြည့်
ဧလ ၂၀၂၀ ခုနှစ်၊ ၃ ရက် U Min Eya Htyke

ဖလမ်း ဧပြီ ၃ တရုတ်နိုုင်ငံမှ ဖလမ်းမြို့သို့ပြန်လာသူ အမျိုးသားတစ်ဦးအား COVID-19 ရောဂါ ကူးစက်ပြန့်ပွားမှုမှ မရှိစေရေး Facility Quarantine ဖြင့် (၁၄)ရက်ကြာ စောင့်ကြည့်ခြင်းကို ဧပြီ ၃ ရက် ညနေပိုင်းမှ စ၍ ဖလမ်းမြို့၊ သူနာပြုသင်တန်းကျောင်း ချယ်ရီခန်းမ၌ စတင်ဆောင်ရွက်သည်။ ဖလမ်းမြို့နယ်၊ ကြောမ်ပီးကျေးရွာနေထိုင်သူ ဦးဟရန်းအီရန်၏သား မောင်ဗာလ်ဟဲ့လိန်သည် တရုတ်နိုင်ငံမှ ပြန်လာပြီး ဖလမ်းမြို့သို့ ဧပြီ ၃ ရက် မွန်းလွဲပိုင်းက ရောက်ရှိပြီး ဖလမ်းမြို့ပြည်သူ့ဆေးရုံတွင် COVID-19 ရောဂါနှင့်ပတ်သက်ပြီး ကျန်းမာရေးစစ်ဆေးခြင်းများပြုလုပ်သည်။ အဆိုပါ တရုတ်နိုင်ငံမှပြန်လာသူသည် ဖလမ်းမြို့ သူနာပြုသင်တန်းကျောင်း ချယ်ရီခန်းမ ခရိုင်၊ မြို့နယ် COVID-19 ရောဂါ ကာကွယ်၊ ထိန်းချုပ်၊ ကုသရေးကော်မတီ၏ အစီအစဉ်ဖြင့်Facility Quarantine ဖြင့် (၁၄)ရက်ကြာ စောင့်ကြည့်စစ်ဆေးမည်ဖြစ်ကြောင်းသိရသည်။ ဂျွန်( ပြန်/ဆက် )

အဆောက်အဦးတည်ဆောက်ခြင်းလုပ်ငန်းများ ကြည့်ရှုစစ်ဆေး
ဧလ ၂၀၂၀ ခုနှစ်၊ ၃ ရက် U Min Eya Htyke

မင်းတပ် ဧပြီ ၃ ချင်းပြည်နယ် မင်းတပ်မြို့ပေါ်ရှိ အဆောက်အဦးတည်ဆောက်ခြင်းလုပ်ငန်းများနှင့် ပြီးစီးမှုအခြေအနေ များကို ယနေ့ နံနက် ၁၀ နာရီခွဲတွင် မင်းတပ်ခရိုင်အုပ်ချုပ်ရေးမှူး ဦးမောင်ထူးနှင့် မြို့နယ် အုပ်ချုပ်ရေး မှူး ဦးမင်းဧရာထိုက်တို့ သွားရောက်ကြည့်ရှုစစ်ဆေးကြကြောင်း သိရသည်။ ရှေးဦးစွာ မင်းတပ်ခရိုင်အုပ်ချုပ်ရေးမှူး ဦးမောင်ထူးနှင့် မြို့နယ်အုပ်ချုပ်ရေးမှူး ဦးမင်းဧရာထိုက် တို့က ၂၀၁၉-၂၀၂၀ ဘဏ္ဍာရေးနှစ် ငွေလုံးငွေရင်းခွင့်ပြုရန်ပုံငြွေဖင့် Horn Bill Land ကုမ္ပဏီက တာဝန်ယူ တည်ဆောက်သော အထက(၁) ကျောင်း၌ RC တစ်ထပ်ဝန်ထမ်းအိမ်ရာ ၉၀×၃၀ ပေကို လည်းကောင်း၊ ဘုန်းမြန်မာကုမ္ပဏီက ငွေလုံးငွေရင်းခွင့်ပြုရန်ပုံငြွေဖင့် တာဝန်ယူတည်ဆောက်သော အထက(၃) ကျောင်း၌ RC တစ်ထပ် ဝန်ထမ်းအိမ်ရာ ၉၀×၃၀ ပေကို လည်းကောင်း၊ ငွေလုံးငွေရင်းခွင့်ပြုရန်ပုံငြွေဖင့် ပါဝါစီးတီးကုမ္ပဏီက တာဝန်ယူတည်ဆောက်သော ရက်ကန်းနှင့် အသက်မွေးပညာသင်တန်းကျောင်း၌ မြေထိန်းနံရံ(ကျောင်းဝင်ပေါက်) ၉၀×၃×၁၂ ပေ တည်ဆောက်နေမှုနှင့် ချင်းအားမာန်ကုမ္ပဏီက တာဝန် ယူတည်ဆောက်သော ကျောင်းသူဆောင်ရေချိုးခန်းနှင့် အိမ်သာ ၂၀×၂၀×၁၂ ပေ တည်ဆောက်ခြင်းကို လည်းကောင်း ကြည့်ရှုစစ်ဆေးကာ သတ်မှတ်ထားသည့်ကာလအတွင်း အရည်အသွေး ပြည့်မီပြီးစီး အောင် ဆောက်လုပ်ကြရန်မှာကြားခဲ့ကြောင်း သိရသည်။ ခွီရှိန်းမောင်း(ခရိုင်ပြန်/ဆက်)

ဟားခါးမြို့၊မြို့မရဲစခန်း အချုပ်ခန်းတွင် သောက်သုံးရေ ပြတ်လပ်မှု မရှိစေရေး မြို့နယ် မီးသတ်ဦးစီးဌာနမှ ရေဂါလန်(၁၆၀၀) သွားရောက်လှူဒါန်း
ဧလ ၂၀၂၀ ခုနှစ်၊ ၃ ရက် U Min Eya Htyke

ဟားခါး ဧပြီ ၃ ဟားခါးမြို့နယ်၊မြို့မရဲစခန်း အချုပ်ခန်းရှိ အချုပ်သားများ သောက်သုံးရေ ပြတ်လပ်မှု မရှိစေရေးအတွက် ဟားခါးမြို့နယ်မီးသတ်ဦးစီးဌာနမှူး ဦးသျှန်နွန်မောင် ဦးဆောင်၍ မီးသတ်တပ်ဖွဲ့ဝင်များသည် ဧပြီလ ၃ရက် နံနက် ၉ နာရီအချိန်က သောက်သုံးရေ ဂါလန်(၁၆၀၀)ကို မီးသတ် ရေသယ်ယာဉ်ဖြင့် သွားရောက် လှူဒါန်းခဲ့ကြောင်း သိရှိရသည်။ ဟားခါးမြို့နယ်မီးသတ်ဦးစီးဌာန အနေဖြင့် ဟားခါးမြို့နယ်အတွင်းရှိ ကျေးရွာများနှင့် ဘာသာရေး ကျောင်းများ၊ အသင်းအဖွဲ့များသို့ နွေရာသီ မိုးမကျမီကာလအတွင်း သောက်သုံးရေ ပြတ်လပ်မှု မရှိစေရေး အတွက် ဆက်လက်လှူဒါန်းပေးသွားမည်ဖြစ်ကြောင်း သိရှိရသည်။ အောင်ခွီရှိန်း(ပြန်/ဆက်)

COVID-19 ရောဂါ ကာကွယ်၊ထိန်းချုပ်၊ကုသရေး လုပ်ငန်းများတွင် ပြည်သူများသိရှိလိုက်နာဆောင်ရွက်နိုင်ရေး ပညာပေး လက်ကမ်းစာစောင်များ အခမဲ့ ဖြန့်ဝေ
ဧလ ၂၀၂၀ ခုနှစ်၊ ၃ ရက် U Min Eya Htyke

ဟားခါး ဧပြီ ၃ ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် ဒေါ်ခင်ကြည်ဖောင်ဒေးရှင်းတို့ ပူးပေါင်း၍ ရွေ့လျားစာကြည့်တိုက်ယာဉ်ဖြင့် စာအုပ်စာစောင်များကို ပြည်သူများလက်ဝယ်အရောက် လှည့်လည်ဌားရမ်းပေးလျက်ရှိရာ ဟားခါးခရိုင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန အနေဖြင့် ဧပြီ ၃ရက်နေ့က ဟားခါးမြို့ ခရိုင်စုပေါင်းရုံးနှင့် ပြည်နယ်မီးသတ်ဦးစီးဌာနရုံးတို့သို့ ရောက်ရှိ၍ စာအုပ်များ ဌားရမ်းပေးခြင်းနှင့် COVID-19 ရောဂါ ကာကွယ်၊ထိန်းချုပ်၊ကုသရေး လုပ်ငန်းများတွင် ပြည်သူများသိရှိလိုက်နာဆောင်ရွက်နိုင်ရေး ပညာပေး လက်ကမ်းစာစောင်များ ဖြန့်ဝေခြင်း၊ စာအုပ်စာစောင်ဌားရမ်းသူများအား ရောဂါကူးစက်မှု မရှိစေရေး သန့်စင်ဆေးရည် ဖျန်းပေးခြင်း စသည့် ဝန်ဆောင်မှုများ ဆောင်ရွက်ပေးခဲ့ကြပါသည်။ အဆိုပါ လက်ကမ်းစာစောင်များကို ဒေါ်ခင်ကြည် ဖောင်ဒေးရှင်းမှ ပြန်ကြားရေးနှင့်ပြည်သူ့ဆက်ဆံရေး ဦးစီးဌာနသို့ လှူဒါန်းပေးခဲ့ပြီး သက်ဆိုင်ရာရုံးများက တစ်ဆင့် ဆက်လက်ဖြန့်ဝေပေးခဲ့ကြကြောင်း၊ ကျန်းမာရေးနှင့် အားကစားဝန်ကြီးဌာန၊ ကျန်းမာရေး အသိပညာမြှင့်တင်ရေး အစီအစဉ်ဖြင့် “မိမိက စ၍ ကာကွယ်ပါ”၊ “သင့်မိသားစု ကျန်းမာရေး စနစ်တကျ လက်ဆေးပေး” စသည့် အချက်များ ပါဝင်သော ပညာပေး လက်ကမ်းစာစောင်များ ဖြစ်ကြောင်းသိရှိရပြီး လက်ကမ်းစာစောင်များအား ပြည်သူအများက စိတ်ပါဝင်စားစွာ ဖတ်ရှုလေ့လာခဲ့ကြကြောင်းသိရှိရသည်။ မြင့်နိုင်စိုး (ပြန်/ဆက်)